"Paytaxtın metro stansiyalarında COVID-19 və ya peyvəndlənmə ilə bağlı xəbərdarlıq lövhələri sadəcə məlumatlandırıcı xarakter daşıyır".
Bunu 24 İNFO-nun sorğusuna cavab olaraq, "Bakı Metropoliteni" Qapalı Səhmdar Cəmiyyətinin mətbuat katibi Bəxtiyar Məmmədov bildirib.
O, Nazirlər Kabineti yanında Operativ Qərargahın qərarına əsasən xüsusi karantin rejiminin müddətinin oktyabrın 2-dək uzadıldığını xatırladıb.
Bildirib ki, məqsədəmüvafiq hesab olunduğu təqdirdə istər stansiyalarda, istərsə də vaqonların daxilində COVID-19-a aid məlumat xarakterli lövhələr mərhələli qaydada götürüləcək:
"Hazırda bununla bağlı məsləhətləşmələr aparılır. Bu günə olan məlumata görə istər xüsusi karantin rejimi, istərsə də ölkədə bu sahədə epidemioloji vəziyyətlə bağlı hər hansı yenilik və ya xüsusi göstəriş yoxdur. İndiki dövrdə həmin bu elanların sayının mərhələli şəkildə azaldılması davam edir".
Metropoliten rəsmisi sərnişinlərin təşvişi üçün əsas olmadığını da sözlərinə əlavə edib:
"Təşviş üçün əsas olsaydı, bu proses xüsusi kampaniya şəklində həyata keçiriləcəkdi. Hazırda buna ehtiyac yoxdur. Buna qədər biz sərnişinlərdə COVID-19 ilə mübarizə istiqamətində ümumi məlumatların formalaşması, vəziyyət sakitləşəndə isə həmin bu elanların mərhələli şəkildə azaldılması strategiyasını seçmişdik və işimizi də buna uyğun həyata keçiririk. Hələlik bu elanların ləğvi ilə bağlı hər hansı göstəriş yoxdur".
İstənilən halda, sağlamlığınıza son dərəcə diqqət yetirmənizi tövsiyə edirik.